سالی نو بلدے بیخی شوم موبارگ
دوبیتیای نوروزی
الیگو جشن نوروزی مبارگ
بلدے روزائی نو، روزی مبارگ
گیلیمی شاو اکو کم کم موشه جم
اومیدی صبح پیروزی مبارگ
اماد از را بهارِ تازه و نو
دوباره ایل میه ده نوری افتو
زیمیستو! او زیمیستو ای کو بورو
شوده شاپاری مورغاگ از تو جو جو
گلیستو پور غزل ده جشن نوروز
طبیعت پور عسل ده جشن نوروز
ده شوقی روی گل بل بل میخانه
دوبیتی یگ بغل ده جشن نوروز
الیکینی اومیده داغ کنی مو
نیالی ایشقه پور آچاغ کنی مو
ده مولگی بیگنه اوماغ نموشه
کشکی بوری وتن اوماغ کنی مو
بلدے اوماغ بوری ده سنگی ماشه
جغے جولگه بیگیردی ایلغو، تاشه
بیچینی تود و زردالوئی مزگی
مزے شی آر مجل ده یاد مو باشه
بیگیردی آغیل و مولگ و دیاره
گولی سورخی پور آوازے مزاره
بیگیردی بلخ، بامیو و ارزگو
هرات و غزنی و غور و تخاره
وتن غم زیره سالی نو شی گومه
غریب گوشنایه نانی شو شی گومه
اومیدی گا سبا کم زوره امزو
وتن بیداره آر شو خو شی گومه
بجز غم کس ده مو شادی نمیدیه
مونه بیرنه و آبادی نمیدیه
وتن ده چنگلی گورگ و شغاله
موکی خاو باشی، آزادی نمیدیه
بسه غم، مو دیگه شادی خو بیگری
تیاری روزی آبادی خو بیگری
نمیدیه کس ده دونیا آقی کس ره
مو ام ده زور خو آزادی خو بیگری
موگیه نوروز اماد، نوروز کوجایه؟
نوروز آر روز ده یگ غم مبتلایه
پارسال پن ما ره ده سنگی سفید مند
ایمسال شش مایه ده تلی سیایه
یخی و قاری پن توغل نمومنه
جیغ و اویے و غلماغل نمومنه
میه نوروزی نو، دونیائی اومید
زیمیستو دیوی بد جیسل نمومنه
بسم ایشیل موشه دشتائی آغیل
میه کیشتائی نو مو پگ ده آسیل
مو سرگردو غدر مندے ده دورو
اکو پیدا موشه یگ را و منزیل
شاعـر : عزیز فیاض
No comments:
Post a Comment